Судија на претходна постапка ги прифати мерките на Обвинителството и за поранешниот заменик министер за земјоделство Трајан Димковски и другите осомничени за давање неточни информации на владата односно за злоупотреба на службената положба и овластување. Обвинителството бараше на осомничените да им се одземе патната исправа и да се јавуваат во суд.

Според обвинителството тие давале неточни информации до Владата поради што е направен отпис на 2.000 тони пченица и јачмен од државните резерви, а штетата на буџетот е околу 780 илјади евра.

Осомничени во случајот се и поранешен директор на Јавно претпријатие за берзанско работење „Агро Берза“, поранешен директор на Агенцијата за стоковни резерви Скопје, поранешен раководител во Агенцијата за стокови резерви и вешто лице.

Димковски беше избран за заменик-министер во Министерство за земјоделство, шумарство и водостопанство (МЗШВ) во септември 2020 година. Тој е од редовите на СДСМ.