Жена од сојузната американска држава Алабама е бремена со две деца, но тие не се близнаци. Келси Хачер (32) е родена со две матки, а сега е бремена и во двете, пишува „Саенс алерт“.

Хачер, која на социјалните медиуми пишува за напредокот на нејзината бременост, на 17-годишна возраст дознала дека има двојна матка (uterus didelphys) – исклучително ретка состојба во која жената има две матки и се јавува кај околу 0,3 проценти од жените.

За време на рутински осумнеделен ултразвук во мај, мајката на три деца дознала дека ќе роди две деца, но дека фетусите се присутни во двете матки.

„Не можевме да поверуваме. За време на првиот ултразвук, многу се смеевме“, напиша таа на социјалниот медиум Инстаграм.

Иако жените со две матки често имаат компликации за време на бременоста, сите три деца на Хачер се родени здрави и без никакви проблеми.

Бременоста во две матки е неверојатно ретка. На Хачер ѝ било кажано дека шансите се една на 50 милиони, а последниот познат случај се случи во Бангладеш во 2019 година, кога 20-годишната Арифа Султана роди две здрави деца со разлика од 26 дена.

Келси се надева дека исто така ќе има непречена бременост и дека ќе се породи кон крајот на декември. Засега сè напредува како што треба.

Она што е „проблематично“ е тоа што матките ќе имаат контракции во различно време, кои можат да бидат со разлика од неколку минути, часови и денови. Келси и нејзиниот сопруг, Кејлеб, се свесни дека царскиот рез можеби е неопходен за едното или дури и за двете раѓања.