Меѓу бројните вина од Медитеранот, малку се оние кои предизвикуваат толку различни реакции како виното рецина. Додека едни го обожаваат поради неговиот необичен вкус, други сметаат дека е вино на кое му треба време за да се навикнете. Сепак, едно е сигурно – рецина е едно од најстарите вина во светот што и денес се произведува речиси на истиот начин како пред повеќе од две илјади години, пишува „ТУ магазин“.

Рецина е традиционално грчко суво вино, најчесто бело, иако постојат и поретки розови варијанти. Она што го издвојува од сите други вина е специфичниот мирис и вкус на бор, кој се добива со додавање смола од алепски бор за време на процесот на ферментација. Токму оваа смола му дава препознатливи ноти на медитерански растенија, борови иглички и лесна смолеста свежина.

 

View this post on Instagram

 

A post shared by Árpád Szilárd Czapp (@wine.inspires)

Оваа необична техника потекнува уште од времето на античка Грција. Во периодот кога стаклените шишиња не постоеле, виното се чувало во глинени амфори, чии споеви биле запечатувани со борова смола за да не навлезе воздух и да не предизвика расипување на виното. Со текот на времето, смолата почнала да влијае врз вкусот и аромата, а Грците толку го засакале тој посебен карактер што продолжиле намерно да ја додаваат и кога веќе не била неопходна за зачувување на виното.

Денес рецина се произведува според строго утврдени правила. По завршувањето на ферментацијата, смолата се отстранува, но во виното остануваат нејзините препознатливи мирисни и вкусни нијанси. Најчесто се прави од сортата грозје саватијано, која добро успева во топлите и суви предели околу Атина, иако се користат и други автохтони грчки сорти.

Рецина најдобро се служи добро изладена, со морски плодови, печена риба, октопод, лигњи, маслинки, сирење фета и традиционални грчки специјалитети. Нејзината изразена свежина и растителни ароми одлично се вклопуваат со медитеранската кујна, поради што е неизоставен дел од летните оброци во грчките таверни.

Иако не е вино што ќе им се допадне на сите уште при првата голтка, рецина претставува важен дел од грчкото винско наследство. Во секоја чаша се крие приказна за античките трговци, амфорите што патувале преку морето до далечни брегови и традицијата што успеала да опстане повеќе од два милениуми.

ФОТО+ВИДЕО | Грчка плажа прогласена за втора најубава во светот и прва во Европа