При чистење на кујната, многумина го занемаруваат аспираторот. Овој уред ги извлекува мирисите при готвење, ја отстранува влагата и маснотиите од воздухот и спречува нивно таложење на ѕидовите и прозорците. Но, токму поради тоа, неговите филтри брзо се валкаат, што може да влијае на ефикасноста, но и на безбедноста, пишува „Клик“.

Редовното чистење не само што го продолжува векот на уредот, туку и го намалува ризикот од запалување на наталожената маснотија.

Зошто е важно редовно чистење?

Додека готвите, аспираторот работи со полн капацитет за да ги отстрани пареата и мирисите. Освен што ја одржува чистотата, тој е важен и за здравјето – особено кај лица со чувствителен респираторен систем. Со редовно чистење се спречува задржување на бактерии и мувла во филтрите.

Нечист аспиратор троши повеќе енергија, послабо влече и може да испушта непријатни мириси. Наталожената маснотија, пак, претставува потенцијална опасност од пожар.

Како да го исчистите аспираторот?

За чист и сјаен аспиратор, доволни се неколку едноставни чекори. Најпрво исчистете ја надворешната површина со средство за миење садови или одмастувач. Нанесете го, оставете да делува околу 10 минути, а потоа избришете со мека влажна крпа. Избегнувајте абразивни средства за да не ја оштетите површината.

Три начини за чистење на филтрите

Откако ќе ја исчистите надворешноста, следи најважниот дел – филтрите:

Миење во мијалник

Потопете ги во топла вода со детергент и исчистете ги со четка. Ако се многу валкани, оставете ги да отстојат неколку минути.

Миење во машина за садови

Поставете ги хоризонтално и вклучете програма за силно валкани садови. Практично и брзо решение.

Со сода бикарбона

Во врела вода додадете околу 200 грама сода бикарбона и потопете ги филтрите пет минути. Потоа исплакнете ги со ладна вода и исушете ги.

Резултатот е чист аспиратор што работи потивко и поефикасно.