Пејачот Џастин Бибер ќе изведе спектакуларно шоу на полувремето од финалето на Светското првенство, кое ќе се игра во Њу Џерси на 19 јули, објави Меѓународната фудбалска федерација (ФИФА), пренесуваат странските медиуми.

Покрај Бибер, на финалето на Светското првенство ќе настапат и ѕвезди како Мадона, Шакира и јужнокорејскиот бенд „БТС“.

На програмата ќе бидат и нигерискиот пејач Бурна Бој, венецуелскиот диригент Густаво Дудамел и хорот „ПС22“, составен од ученици од основно училиште од Стејтен Ајленд во Њујорк, а ќе им се придружи и групата „Колдплеј“.

Единаесетминутната изведба на полувремето, која ја смисли Крис Мартин од групата „Колдплеј“, е поддржана од Фондот на ФИФА и организацијата „Глобал ситизен“ за образование, која собира 100 милиони долари за децата ширум светот да имаат пристап до образование и фудбал.

– Светското првенство го обединува светот на начин на кој ниеден друг настан не може. Благодарен сум што ќе сум дел од ова шоу на полувремето, а уште повеќе затоа што знам дека ќе им помогне на децата ширум светот да имаат што е можно поголем пристап до образование – рекол Бибер во изјава.

Програмата на шоуто на полувремето е најпозната за време на Супербоул во американскиот фудбал, додека Лигата на шампионите организира концерт пред почетокот на финалето.

Овогодишната програма на полувремето од финалето на Светското првенство ќе вклучува некои ликови од анимираната серија „Улица Сезам“, како и ликови од „Мапет шоуто“ како што се Кермит и госпоѓица Пиги.

Шакира, Мадона и „БТС“ ќе настапат на првото шоу на полувреме во историјата на Мундијалите