Педесет и две годишен пациент кој чекал на националната листа за трансплантација од 2021 година доби ново срце од донор, а 23 годишник нов бубрег, информира денеска Министерството за здравство.

Двајцата пациенти се во стабилна состојба.

-Во градите на 52-годишен пациент, кој од 2021 година со нетрпение и верба чекал на националната листа за трансплантација – од денес чука ново срце. Симбол на нов живот, нов почеток и неизмерна благодарност. Со оваа исклучителна одлука за органдонорство, нивниот сакан продолжува да живее во срцата, телата и насмевките на луѓе кои повторно имаат шанса. Истовремено, 23-годишно момче доби бубрег и со него, шанса за поквалитетен живот – се наведува во соопштението на Министерството за здравство.

Оттаму упатуваат благодарност до семејството на починатиот, чијашто била конечната одлука да се донираат органите.

Од Министерството за здравство информираат дека донирани се и коскени ткива, како што потенцираат, „уште еден исклучителен дар, кој ќе помогне во лекување и обновување на живот“.

-Министерството за здравство изразува најдлабока почит за ова храбро семејство. Нивната одлука за нас е патоказ при креирање на идните политики. Благодарност до сите здравствени работници чија посветеност, експертиза и професионалност ја имаа оваа благородна мисија за нова надеж и нов живот, вели министерот за здравство, Азир Алиу.

„Слободен печат“ дознава: Голема инспекција во Институтот за јавно здравје, поради административци што не полагале испит