Дука: Во Дебар нема нови случаи на заразени со корона вирусот
Обезбедувањето со прехранбени и други артикли и лекови се одвива без проблеми.
Градоначалнкот на Дебар, Хекуран Дука, кој раководи со Оперативниот штаб откако во петокот во општините Дебар и Центар Жупа беше воведена кризна состојба со цел спречување на ширењето на коронавирусот, ситуацијата во Дебар во моментов ја оценува како добра и тврди дека за сега препораките се почитуваат.
– Нема нови заразени, се надеваме дека така ќе биде и понатаму. Обезбедувањето со прехранбени и други артикли и лекови се одвива без проблеми. Во Општата болница почна со работа екипата што пристигна од Скопје и заедно со нашите екипи е на терен во откривање на евентуално нови случаи и следење на болните, истакнува градоначалникот на Дебар.
Тој додава дека од Црвениот крст го информирале дека имаат многу повици од граѓани кои бараат храна, облека и лекови, објаснувајќи дека дотур на храна и лекови се врши само на семејства кои се во домашна изолација.