Вардар го претрпе и вториот пораз (по ред) сезонава во Лигата на шампионите и тоа повторно со висока разлика овојпат на гостувањето во Унгарија кај Веспрем.

После мечот на прес конференцијата вообичаено доаѓаат тренерот и еден од играчите, но во овој случај Едуард Кокшаров не се појави пред медиумите, туку тоа го направи тренерот на голманите, Дејан Периќ.

Потсетување дека Кокшаров е само привремено решение на тренерската клупа додека не се најде стратег кој ќе ја води екипата, а Писонеро како што и се најави само беше помошник.

Почнувајќи од високиот пораз во СЦ „Јане Сандански“ пред полни трибини од Кил, а сега и денешниот од Веспрем покажува дека европскиот шампион е во криза и под итно треба нешто да се менува.

– Мислам дека тактички Веспрем се покажа многу подобар од нас. Бевме надиграни во секој аспект од играта. Се боревме, неколку пати доаѓавме до „минус два“ негатива, но Веспрем одигра одлично и заслужено ги освои бодовите – рече тренерот на голманите на Вардар, Периќ.

Ракометарот на Вардар, Кристиан Дисингер:

– Добро се боревме во првите 40 минути, но потоа не знам што се случи. Веспрем возврати со уште повеќе голови во нашата мрежа. Противникот беше многу подобар од нас.