Во моментот е повеќе од јасно дека компаниите веќе не може да сметаат на државните пари, за февруарската или за мартовската плата, бидејќи е неизвесно кога ќе се усвојат законите, резигнирани се стопанствениците.

-Додека Собранието е во „мирување“ ни остануваат две опции – позајмици и задолжувања и посегање по остатоците од внатрешните резерви за оние кои се во состојба тоа да го сторат или масовно отпуштање на работниците, за да се скратат трошоците и да се преживее во наредните два до три месеци. Трето нема – вели за „Слободен печат“, Ангел Димитров, претседател на Организацијата на работодавачи.

Според Димитров, неусвојувањето на толку потребните закони, ќе предизвика огромна економска штета, бидејќи компаниите, ја вкалкулираа ветената државна поддршка.

-Додека пратениците се надмудруваат и се прават недоветни, префрлајќи си ја топката од еден на друг, изворите на свежи пари се веќе лимитирани, а резервите се истопија. Петтиот пакет мерки е во собраниска процедура пред повеќе од еден месец, а ќе се сторат четири месеци и за другите мерки. Власта обвинува дека опозицијата е виновна што не се донесени пакетите, опозицијата тврди дека државата нема пари и затоа го одложува гласањето. Во меѓувреме, поголемиот дел од фирмите уште немаат исплатено февруарска плата за своите работници, а таква ќе биде судбината и на мартовската плата – потсетува Димитров. Според него, минимална е можноста и за премостување со владини уредби, бидејќи Собранието треба да гласа и за вонредна состојба.