Димитријевиќ меѓу најефикасните на последниот меч годинава во Шпанија!
Во 16 коло од најсилното шпанско првенство екипата на Хувентуд Бадалона загуби убедливо на домашен терен од Сан Пабло Бургос со резултат 78:95.
Иако доминираше домаќинот во првото полувреме, достигнувајќи и предност од „плус осум“ (16:8), на крајот гостите направија целосен пресврт, освојувајќи ги третата и последната четвртина со 18:31, односно 19:27.
Македонскиот репрезентативец Ненад Димитријевиќ во поразот беше меѓу единствените тројца во својата екипа кои беа „двоцифрени“.
Нашиот играч за нешто над 17 и пол минути игра на паркетот забележа 10 поени, две асистенции, два скока, а поефикасни беа А. Вентура со 13 поени и Ф. Басас со 11.
На табелата Хувентуд е на шестата позиција со 20 бодови, колку што има и Сан Пабло Бургос на петтата позиција. Следниот првенствен меч Димитријевиќ ќе го има во новата 2021 година, поточно на 4 јануари против Валенсија.