Македонскиот репрезентативец се најде на скратениот список од 12 кошаркари кои конкурираат за наградата за најдобар млад играч во најдобрата шпанска „Ендеса“ лига.

Ненад Димитријевиќ зад себе има една доста добра сезона. И минутите кои ги доби од стручниот штаб на Хувентуд, ги искористи максимално.

Нашиот интернационалец е еден од тројцата кошаркари на клубот од Бадалона кои се најдоа во овој финален избор, заедно со Жоел Пара и Артурс Жагарс.

Гласањето ќе трае до 24 јуни, кога ќе биде познато името на новиот освојувач на ова признание, како и на најдобрата петорка составена од млади кошаркари во Ендеса лигата.

Наскоро Македонецот ќе настапи за Хувентуд на завршниот турнир од шпанскиот шампионат што ќе се одржи во Валенсија.