По одлуката на Европската ракометна федерација (ЕХФ) да се исклучи Вардар од настапот во Лигата на шампионите 2022/2023, големо разочарување и неизвесност моментно владее меѓу ракометарите на црвено-црните. Тие не знаат на што се и очекуваат информации и договор со раководството на клубот.

Руското крило Тимур Дибиров ни изјави дека се уште е рано да донесе одлука за некакво заминување и чека информации од управата.

– Има големо разочарување и некакво чувство на неправда (поради исклучувањето на Вардар од ЛШ н.з.). Се уште е рано да зборуваме што понатаму, затоа што се уште немаме поконкретни информации од клубот. За одредено време треба да се собереме сите и ќе разговараме како Вардар ќе функционира понатаму. Моментно сме во неизвесност – ни изјави Дибиров.

За Стојанче Стоилов ова е голем удар за клубот.

– Голем удар му е нанесен на Вардар. Како може така да одлучиле (ЕХФ да го суспендира Вардар н.з.)?! Не знам дали имале предвид дека тоа ќе биде страшно голем удар за клубот! Сите играчи чекаат и се во неизвесност околу тоа што ќе биде со Вардар понатаму. Чекаме со луѓето од клубот да видиме како понатаму – ни изјави Стоилов.