Она што започна како драматична меѓународна потрага по исчезнат англиски навивач за време на Светското првенство, заврши со неочекуван пресврт. Мајкл Хјуит кој има 65 години е пронајден жив и здрав по десет дена, но не во САД, каде што требаше да отпатува, туку во Барселона, каде што деновите ги минувал во барови следејќи ги натпреварите.

Навивачот на Лидс јунајтед и англиската репрезентација требало преку Барселона да отпатува за Бостон за да ги бодри „трите лава“ на Светското првенство. Сепак, веднаш по пристигнувањето во каталонскиот град го изгубил мобилниот телефон, што целосно му ги нарушило плановите.

Додека неговото семејство, британските власти и Интерпол верувале дека исчезнал некаде во САД, Хјуит безгрижно престојувал во Барселона, каде што ги следел натпреварите и уживал во атмосферата по локалните барови и пабови, без воопшто да знае дека по него се води меѓународна потрага.

Тој пристигнал во Шпанија на 20 јуни, како дел од патувањето кон Бостон, каде што требало да присуствува на натпреварот меѓу Англија и Гана. Според неговото семејство, проблемите започнале веднаш откако го изгубил мобилниот телефон.

„Го изгуби телефонот кратко по пристигнувањето во Барселона и не знаеше ниту еден телефонски број бидејќи сите му беа зачувани во уредот“, изјави неговиот брат Гери.

Иако со себе ги имал пасошот и парите, Хјуит не побарал помош од британската амбасада, сметајќи дека нема потреба.

„Не ни помислил да оди во амбасадата бидејќи сè уште ги имал пасошот и парите, па верувал дека нема причина да бара помош“, додал неговиот брат.

Без пристап до интернет и без можност да стапи во контакт со своите најблиски, Хјуит немал никаква претстава дека неговото исчезнување предизвикало голема акција во која се вклучиле британските власти и Интерпол.

🍺🤣 Meet Michael Hewitt, a 65-year-old England fan. He was reported missing last week after disappearing during a layover in Barcelona on his way to Boston.

His family contacted the British Embassy and even INTERPOL after they couldn’t reach him for 10 days.

In reality, there… pic.twitter.com/Gb1tbJ4QJ4

— Football Tweet ⚽ (@Footballtweet) July 5, 2026

Наместо да паничи, тој едноставно решил да го искористи неочекуваниот престој во Барселона.

„Едноставно уживаше во Барселона и ги гледаше натпреварите на Англија во баровите“, раскажал Гери.

Во меѓувреме, семејството станувало сè позагрижено, откако последен пат разговарале со него на 21 јуни. Последната трага биле фотографиите објавени на Фејсбук, на кои се гледал во еден паб во Барселона, по што целосно му се изгубила трагата.

Како што растела загриженоста, во потрагата се вклучиле британското Министерство за надворешни работи, Комонвелтот и развој, како и Интерпол, додека семејството споделувало апели за негово пронаоѓање на социјалните мрежи.

Случајот конечно добил среќен епилог кога британската амбасада во Шпанија успеала да го лоцира хотелот во кој престојувал преку трансакциите со неговите банкарски картички. Откако стапиле во контакт со хотелот, дипломатите му овозможиле повторно да се слушне со своето семејство.

„Како семејство очајно посакувавме оваа тешка приказна да заврши со едноставно, но среќно решение. За наша среќа, токму така и се случи“, напишал Гери Хјуит на Фејсбук по пронаоѓањето на неговиот брат.

Leeds United fan Michael Hewitt remains missing having travelled to Spain, on route to the World Cup.

His brother Gary has been telling us about the last known contact with ‘Little Mick’. #LUFC pic.twitter.com/Tz1YdVwaTP

— BBC Sport West Yorkshire (@BBCWYS) June 30, 2026