Филмскиот фестивал „Санденс“ започнува денеска и ќе биде посебно по многу нешта. Ова е прво издание на фестивалот без основачот Роберт Редфорд по неговата смрт во септември, и последно во Јута пред фестивалот да се пресели во Боулдер, Колорадо. Значи, овој фестивал ќе биде значаен, бидејќи се збогува со својот основач и неговата татковина, пишува Би-би-си.

„Овој фестивал е за нови почетоци и завршетоци“, изјави неговата ќерка во разговор за агенцијата „АП“. „Имам намера да се осврнам околу себе, да го впијам секој момент, да уживам и да не земам ништо здраво за готово.“

Наследството на Роберт Редфорд и повеќедецениската историја на „Санденс“ во Јута се клучни теми на фестивалот во 2026 година, кој официјално започнува во четврток наутро, кога во текот на денот ќе бидат прикажани премиери на повеќе од десет филмови.

Откако ќе се смират впечатоците од објавувањето на номинациите за Оскарите, фестивалот ќе влезе во полн замав со светски премиери како документарецот на Амир Бар-Лев „Последното прво: зима К2“ (The Last First: Winter K2), кој ја прикажува променливата култура на екстремното планинарење; нежната драма на Рејчел Ламбер „Вртелешка“ (Carousel) со Крис Пајн и Џени Слејт во главните улоги; и филмот на Џад Апатов, портрет на комичарката Марија Бамфорд и нејзиното патување низ менталното здравје, исто така на програмата за првиот ден.

Во програмата се и филмот на Дејвид Алварадо „Американски Пачуко: Легендата за Луис Валдез“ (American Pachuco: The Legend of Luis Valdez), за наследството на овој драматург и режисер, како и „Ученикот“ (The Disciple) на Џоана Натасегаре, кој ја прикажува неверојатната, но вистинита приказна за тоа како холандско-мароканскиот музички продуцент Цилварингз (Cilvaringz) стигнал до највнатрешниот круг на кланот Ву-Танг (Wu-Tang Clan).

Авторот на „Премногу готвачи“ (Too Many Cooks), Каспер Кели, ќе ја прикаже премиерата на својот филм „Пријател“ (Buddy), со Кристин Милиоти, за бегството од детска телевизиска емисија.

Фестивалот „Санденс“ ќе трае до 1 февруари.

Почина холивудската актерска и режисерска икона Роберт Редфорд