Денес, во 16:03 часот, настапува зимскиот солстициум – точниот астрономски момент со кој официјално започнува зимата. Воедно, ова е и најкраткиот ден во годината.

Зимскиот солстициум го означува периодот кога Сонцето ја достигнува својата најниска позиција на небото над северната, односно јужната хемисфера. По овој ден, дневната светлина постепено почнува да се зголемува – најпрво многу бавно, а потоа сè поизразено како што се приближува мартовската рамноденица и најавата за пролетта.

Во подрачјата поблиску до половите, разликите во должината на денот и ноќта се многу понагласени. Во рамките на поларните кругови, делови од зимата минуваат во таканаречена поларна ноќ, кога Сонцето воопшто не изгрева.

Иако деновите по солстициумот стануваат подолги, температурите во повеќето региони продолжуваат да опаѓаат. Причината е таканареченото сезонско задоцнување – Земјата, а особено океаните, бавно ја менуваат температурата и реагираат со одредено одложување.

Почетокот на зимата и зимскиот солстициум со векови се одбележуваат во различни култури и религии низ светот, преку обичаи, празници и фестивали.

На северната хемисфера, и астрономската и метеоролошката зима траат од декември до март, додека на јужната хемисфера започнуваат во јуни и завршуваат во септември.