Демократите во Комитетот за надворешни работи на американскиот Сенат денеска ја осудија намерата на претседателот Доналд Трамп да добие суперлуксузен Боинг 747-8 од катарското кралско семејство за да служи како претседателски авион и најавија дека ќе бараат гласање во тоа тело за да се осуди потегот.

„Уставот е јасен – избраните функционери, вклучително и претседателот, не можат да прифатат големи подароци од странски влади без одобрение од Конгресот“, рекоа сенаторите Крис Кунс, Кори Букер, Брајан Шац и Крис Марфи во заедничката изјава, пренесе Си-ен-ен.

Тие додаваат дека претседателскиот авион е симбол на САД и дека секој претседател кој ќе добие таков подарок, вреден 400 милиони долари, е во јасен конфликт на интереси, како и дека поставува сериозни прашања за националната безбедност и странското влијание.

Сенаторите додадоа дека оваа недела ќе побараат Сенатот да гласа дали некој треба да користи јавна функција за лична корист преку подароци од странство.

Катарски функционер претходно изјави дека авионот технички бил подарок од катарското Министерство за одбрана на Пентагон, опишувајќи го повеќе како меѓувладина трансакција отколку лична работа, пренесува Танјуг.