Давид Дејвис со победа дебитираше на клупата на Вардар во натпреварите во Лигата на шампионите,откако „црвено-црните“ со 25:28 славеа на гостувањето кај Монпелје.

Дејвис кој дојде на местото на Веселин Вујовиќ,  успеа да ги размрда ракометарите кои од натпревар во натпревар играат се подобро под негово водство, а со прикажаната игра против Монпелје потсетија на „црвено-црната“ машинерија која освои две титули во ЛШ.

– Сакам да им честитам на играчите, тие завршија фантастична работа, одиграа одлично против Монпелје. Ова е многу важна победа, имаше голема борба и среќен сум за триумфот. Нашата одбрана беше добра, голманите беа добри, нападот беше добар и задоволни сме од тоа што го прикажавме против ваков силен противник – изјави Дејвис.

Оливие Њокас со шест гола беше најефикасен во редовите на Вардар, а по натпреварот Французинот откри дека по доаѓањето на Дејвис, работите во екипата тргнале многу подобро.

– Задоволни сме како одигравме. Откако Дејвис пристигна во клубот, ние многу работевме. Овој триумф не е на среќа. Секој играч си ја вршеше својата задача и сите работевме напорно за да дојдеме до посакуваната форма. Не е лесно да се дојде тука и да се победи. Овој триумф е важен за нас, се надевам дека победите ќе ни се множат. Имавме разочарувачки партии на изминатите средби и се надевам дека овој дуел ќе ни биде од голема помош за средбите кои слредат – рече Њокас на прес-конферецијата по натпреварот.

Со победата над Монпелје, Вардар се искачи на шестото место на табелата во групата А и наредната недела во СЦ „Јане Сандански“ ќе игра против ППД Загреб во натпревар кој ќе одлучува за пласман во нокаут фазата во ЛШ.