Дејан Пановски е новиот претседател на Скијачката федерација на Македонија
На Изборното собрание на Скијачката федерација на Македонија беше одлучено за нов претседател да биде прогласен Дејан Пановски.
Пановски е инаку поранешен алпски скијач, со два настапи на Зимските олимписки игри во 1998 и 2002 година, а воедно настапуваше на Светско првенство во сениорска и јуниорска конкуренција.
Тој беше едногласно избран од страна на 13 клубови, а на изборот присуствуваше и претседателот на Македонскиот олимписки комитет, Даниел Димовски, како и претставник од Агенцијата за млади и спорт.
Мандатот на Пановски ќе трае една година, а потоа ќе се одржи нов избор во собранието на федерацијата. Како што самиот најавува, ќе го даде максимумот зимскиот спорт во нашата земја да има подобри резултати и се бележи поголем напредок.
Целта на Пановски ќе биде да се унапредува квалитетот на сите спортови при Скијачката федерација на Македонија, да се обезбедат средства за млади талентирани натпреварувачи, усовршување на постоечките стручни кадари, како и популаризација и заживување на скијачките клубови, а со тоа и зимскиот спорт во Македонија.