Дарко Рајаковиќ ќе биде тренер на Остатокот од светот на НБА Ол-стар натпреварот
Српскиот кошаркарски тренер Дарко Рајаковиќ, кој го предводи тимот на Торонто, денеска беше именуван за тренер на „Остатокот од светот“ во НБА Ол-стар натпреварот, соопштија од натпреварувањето.
Препорачано
Новиот формат вклучува натпревар помеѓу тимот на САД, кој е составен од играчи од оваа земја, и „Остатокот од светот“, а за 46-годишниот Рајаковиќ ова ќе биде прв пат да предводи тим во Ол-стар натпреварот како главен тренер, откако беше асистент на тренерот на Оклахома, Скот Брукс, во 2014 година.
Торонто е на петтото место на табелата во Источната конференција на Американската професионална кошаркарска лига (НБА) оваа сезона со учинок од 30-21, а канадскиот тим е на добар пат да го обезбеди своето прво место во плејофот од 2022 година.
Рајаковиќ ја започна својата тренерска кариера на 16-годишна возраст во Србија, пред да се пресели во Шпанија. Тој работи во Соединетите Американски Држави од 2012 година, каде што беше помошник тренер во Оклахома сити, Феникс и Мемфис, пред да ја преземе функцијата главен тренер на Торонто во јуни 2023 година.
Тој беше и дел од стручниот штаб на српската репрезентација на Светското првенство во Кина во 2019 година.
Ол-стар викендот е закажан за 13 и 15 февруари во Лос Анџелес, а НБА ќе го објави конечниот состав за натпреварот во вторник навечер.
