ЦУК: Турнати бандери, паднати дрвја и искршени автомобили по ветерот и поплавите
Центарот за управување со кризи (ЦУК) информира за епилогот по невремето, поплавите и ветерот што ја зафати Македонија. Во Скопје, како резултат на ветерот, на шест локации се пријавени паднати дрвја и искинати кабли, при што е причинета материјална штета на повеќе автомобили.
Препорачано
За состојбата се известени СВР Скопје и ЈП „Паркови и зеленило“, кои преземаат мерки во рамки на своите надлежности.
„Во врска со поплавите од претходните денови во селата Чајлане, Буковиќ и Семениште, состојбата постепено се нормализира“, посочуваат од ЦУК.
Од ветрот во Скопје настрадале дрвја, има и искинати кабли и оштетени автомобили
Околу поплавите, во Тетово, патниот правец меѓу селата Тумчевиште и Чегране сè уште е затворен за сообраќај поради безбедносни причини.
Нивото на реката Вардар е намалено во однос на претходните три дена и во моментов нема опасност од излевање.
„Во текот на ноќта, во селата Нераште и Глоѓи (Општина Теарце) паднати се две бандери од Телеком. Во село Нераште бандерата е падната покрај патот и не го блокира сообраќајот. Во село Глоѓи бандерата е падната преку патот. Известен е Телеком, а проблемот ќе се решава во текот на денот“, соопштува ЦУК.
На територијата на Кичево се очекува понатамошна стабилизација на состојбата. Нема пријави за одрони на магистралните патишта и сообраќајот се одвива редовно.
„Бројот на евакуирани лица останува непроменет – 250 лица (63 семејства), на кои редовно им се доставуваат храна, вода и неопходни средства. Екипа од Медицинскиот центар врши здравствени прегледи и дава соодветни совети на евакуираните лица“, нагласуваат од ЦУК.
Екипи на ЈП „Комуналец“ работат на расчистување и продлабочување на коритото на Зајашка Река, со поддршка од механизација на локални компании.
„Паралелно се врши чистење на фекалната и атмосферската канализација. ТППЕ, со поддршка на пумпи од ПО ДЗС Кичево, продолжува со испумпување на водата од подрумите на улиците Прилепска, Пиринска, Први Мај, 29 Ноември и други локации каде има пријави за поплавени објекти“, стои во утринското соопштението по поплавите и ветерот.
Инаку, ЦУК претходно извести и дека силниот ветер откорнал лимена конструкција од кровот на средното училиште „Јосиф Јосифовски“ во Гевгелија. Случајот бил пријавен преку Единствениот број за итни повици 112.
