Францускиот напаѓач Усман Дембеле денеска беше прогласен за најдобар фудбалер во светот во изборот на Меѓународната фудбалска федерација (ФИФА).

Откако на 22 септември ја освои „Златната топка“ благодарение на импресивната сезона со Пари Сен Жермен, со кој ги освои Лига 1, Купот, Лигата на шампионите и Суперкупот на Европа, Дембеле доби уште едно големо признание – наградата за најдобар фудбалер во светот според ФИФА.

Не е секогаш правило добитниците на „Златната топка“ да ја освојат и оваа награда. Меѓу оние што биле прогласени за најдобри од ФИФА, а никогаш не ја освоиле „Златната топка“, се Роберт Левандовски (двапати) и Винисиус Жуниор минатата година.

Најмногу вакви признанија има Лионел Меси – три, додека Кристијано Роналдо и Роберт Левандовски имаат по две.

Во женска конкуренција, победничка е фудбалерката на Барселона, Аитана Бонмати, која исто така претходно оваа година ја освои „Златната топка“ во организација на „Франс фудбал“.

За најдобар тренер беше прогласен Луис Енрике.

Идеалниот тим на годината го сочинуваат: Донарума – Мендеш, Ван Дајк, Пачо, Хакими – Педри, Витиња, Белингем, Палмер – Дембеле, Јамал.