Екипата на РК Бутел во следната сезона ќе влезе со поголеми амбиции бидејќи обезбеди пласман во европските купови, а желбата е и тимот сериозно да се вмеша во битката за трофеите. По ангажманот на Денис Тот од Охрид, суперлигашот денеска го промовира и довчерашниот голман на Е. Пелистер, Градимир Чаневски. Чаневски потпиша четиригодишен договор, а освен во Е. Пелистер, има настапувано и за Металург, Вардар и Вардар Јуниор.

– Имав неколку понуди од странство и од Македонија, но понудата од Бутел Скопје беше најдобра за мене. Имавме разговори со сопственикот на клубот и сфатив дека станува збор за амбициозен проект поддржан и воден од одличен кадар. Бутел има добра екипа, хомогена и сите се како еден, а тоа е одличен предуслов. Од тоа што го знам, Бутел е еден од најорганизираните и најпрофесионалните клубови во Македонија. Среќен сум што се враќам во Скопје по пет години поминати во Битола. Сега следува малку одмор, а потоа да се фатиме за работа, затоа што не очекува напорна и интересна сезона – изјави Чаневски.