Бутел несреќно елиминиран од ЕХФ Купот
Денеска на реваншот од второто квалификациско коло на ЕХФ Купот за учество во групната фаза во Украина составот на Бутел од Скопје загуби со 29:24 (13:9) од екипата на ЗТР Запорожје.
На првиот меч во Македонија нашиот ракометен клуб имаше предност од 18:14, но не успеа да ја задржи позитивата на возвратната пресметка во Запорожје.
Констатно водеше домаќинот на оваа средба, веќе во првото полувреме ја анулираше својата негатива од првиот дуел, односно на семафорот стоеше 9:4 во 16 минута, а непосредно пред паузата 12:7.
Вториот дел добро го започна тимот на Бутел намалувајќи неколку пати на минус два (16:14, 17:15), а успеа дури и да израмни во 45 минута на 20:20 со погодокот на Димовски.
Се држеа добро гостите се до 52 минута кога при негатива од 25:23, Украинците направија серија од 3:0. Беше во тек последната минута, Бутел можеше да си дозволи и пораз од четири голови, бидејќи одамна веќе имаше постигнато 14 голови. Намали Печенковски во 28:24, но на спротивната страна стрелаше Залевскји кој го постави конечниот епилог.
Во победничките редови по шест голови имаа Ганчев и Залевскји, а во редовите на Бутел Мајиќ реализираше осум погодоци, два помалку Печенковски.