Официјална Софија конечно реагираше на провокациите на Скопје по повод заедничкиот железнички проект – дел од Трансевропскиот коридор бр. 8, објави порталот „Сега.бг“. Оттаму велат дека „бугарската влада го повикува Скопје одговорно и со добра волја да пристапи кон сите обврски и договори со цел навремена изградба на делниците од трасата на Трансевропскиот Коридор 8 на нејзина територија“.

Тамошната власт потсетува: „Бугарија успешно лобираше за обезбедување европски фондови, вклучително и за Република Северна Македонија. Благодарение на бугарските напори, Коридорот 8 беше вклучен во опсегот на европскиот транспортен коридор „Западен Балкан – Источен Медитеран“ како приоритет за ЕУ. На крајот на 2023 година, делницата Крива Паланка – Деве Баир беше назначена од ЕУ како еден од шесте водечки проекти од стратегијата „Глобална порта“ и финансирана со над 500 милиони евра грантови и заеми. Модернизацијата и завршувањето на железничката компонента на Коридорот 8 на бугарска територија е дел од националната програма „Транспортно поврзување 2021 – 2027 година – пишува порталот.

Бугарскиот медиум потенцира дека Коридорот 8 не е само врска помеѓу двете земји, туку и клучна логистичка маршрута во должина на јужното крило на НАТО од Јадранот до Црното Море и „одбивањето да се изградат основните компоненти на Коридорот 8 ја ослабуваат колективната безбедност на Алијансата“.