Франковиот знак, познат како набор на ушната ресичка, е траен видлив набор на едната или двете ушни ресички што се протега дијагонално. Истражувањата покажуваат дека присуството на Франковиот знак може да укажува на поголем ризик од развој на кардиоваскуларни болести, пренесува „АОЛ“.

Почест е кај белците и е поверојатно да се појави со текот на годините, често како дијагонална линија на ушната ресичка што се спушта надолу.

Истражувањата покажуваат дека Франковиот знак може да биде резултат на прераспределба на сврзното ткиво и намалена густина на капиларите (микроскопски крвни садови) во ушната ресичка.

Други истражувања откриле дека Франковиот знак може да се формира како резултат на забрзано стареење или поради промени во најмалите крвни садови во телото (како што се оштетување или стеснување на крвните садови).

Меѓутоа, студиите сè уште се во тек за да се потврдат точните механизми на неговото настанување.

Во раните студии, Франковиот знак често се забележувал кај луѓе со историја на коронарни срцеви болести (најчестиот вид срцево заболување), исхемични промени (намален проток на крв и кислород во некој дел од телото) или ангина пекторис (болка или непријатност во градите поради намален проток на крвта и кислород до срцето).

Неодамна, истражувачите во повеќе студии откриле дека Франковиот знак е силен маркер за ризик од срцеви заболувања.

Истражувањата, исто така, покажале дека може да биде ран индикатор за периферна микроангиопатија, болест на малите крвни садови што се наоѓаат во ткивата надвор од срцето и мозокот.

Иако присуството на Франковиот знак на ушната ресичка и понатаму е контроверзно меѓу некои лекари, можеби е корисно да разговарате за тоа со вашиот лекар.

Истражувањата покажуваат дека постои силна врска помеѓу Франковиот знак и зголемениот ризик од срцеви болести.