Министерот за економија Крешник Бектеши им порача на производителите на млечни производи да не прават калкулации и притисок со намалување на цените за откуп на сурово млеко за да на тој начин го поевтинат крајниот производ. Согласно одлуката на Владата, од 16 март се намалува цената на основните млечни производи за 10 проценти.

– Би сакал да порачам да не се прави притисок на кооперантите, односно на земјоделците и да не им се намалат цените на оние што продаваат сурово млеко, затоа што анализите се направени многу точно и покажуваат дека има многу голем простор за вакви намалувања на цените. За потсетување, млечните производи биле со утврдена маржа од 10 проценти во големопродажба и 10 проценти во малопродажба, што е вкупно 20 проценти. Ние одлучивме тој простор да им го намалиме на 10 проценти, што значи да се намалат нивните профити – рече Бектеши.

Одлуката за намалување на цените и за нивно замрзнување е од 16 март, нагласи Бектеши и рече дека со тоа им се дава простор на сите увозници и на сите компании – и тие што се занимаваат и со тестенини и со млечни производи, да ги сменат договорите со кооперантите и со трговците на мало.