Бебешко пред мечот со Македонија: Нè гледаат како аутсајдери!
Најголемата опасност од украинската репрезентација се очекува да биде голгетерот на Еурофарм Пелистер во ЛШ, Владислав Остроушко.
Селекторот на Украина, Сергеј Бебешко вели дека и покрај тоа што не се фаворити за првите две позиции во групата „Б“, ветува дека неговите играчи нема предвреме да се предадат и на сите натпревари ќе оди на позитивен резултат.
Во групата играат уште домаќинот Австрија и репрезентацијата на Чешка во прелиминарната фаза.
– Да се победи против Македонија е првиот предизвик со кој ќе се соочиме со цел да продолжиме да гледаме напред во првенството. Според ракометните експерти се наоѓаме меѓу аутсајдерите на ЕП, но доколку го имаме потребниот карактер и сакаме да се подобруваме, можеме до добар резултат.
Ја анализиравме Македонија, не ги одиграа пријателските натпревари во целиот состав. Мислам дека тие ја развија играта на бековската позиција – имаат голем потенцијал. Имаат пет-шест многу искусни играчи на кои треба да внимаваме – рече Бебешко.
Најголемата опасност во украинската репрезентацијата најверојатно ќе дојде од левиот, голгетерот на Еурофарм Пелистер, Владислав Остроушко, моментно прв стрелец со 65 голови сезонава во Лигата на шампионите.