Селекторот на фудбалската репрезентација на Македонија, Игор Ангеловски се соочува со голем проблем бидејќи еден од најдобрите и најстандардните репрезентативци, Енис Барди, сè уште е позитивен на коронавирус.

Денешниот тест на Барди повторно е позитивен по што одличниот фудбалер на Леванте, ќе почека за да им си приклучи на останатите репрезентативци на завршните подготовки пред настапот на Европското првенство.

Барди иако не чувствува никакви симптоми, останува во карантин во хотелот „Хилтон“ и според протоколот, не смее да има никаков контакт со останатите фудбалери.
Сега Барди е во трка со времето бидејќи репрезентацијата на 8 јуни патува за Букурешт каде ќе ги одигра првите две кола од групата Ц против Австрија (13. јуни) и Украина (17. јуни) и за да може да патува со останатите соиграчи дотогаш ќе мора да има негативен тест на коронавирус.