Водителките во големите авганистански телевизиски станици денеска се појавија во програма со непокриени лица и на тој начин и прекосеа на наредбата на талибанците жените во Авганистан задолжително да го покриваат целото лице во јавност.

Откако се вратија на власт минатата година, талибанците воведоа сериозни ограничувања за населението, од кои многу се однесуваат на правата на жените.

На почетокот на овој месец, највисокиот лидер на талибанците издаде наредба жените во јавност да бидат целосно покриени, вклучувајќи го и лицето, советувајќи ги да бидат во традиционална бурка. Порано беше доволно да се покрие само косата со марама.

Авганистанското Министерство за промоција на доблести и спречување на пороците, исто така, им нареди на ТВ презентерките да ја почитуваат нивната одредба, која стапи на сила денеска. Но, новинарките од TOLOnews, Shamshad TV и 1TV се појавија во живо на програмата без покриени лица.

„Нашите сестри се загрижени дека ако ги покријат лицата, ќе им биде наредено да престанат да работат потоа и затоа не ја исполниле наредбата“, изјави за АФП Абид Ехсас, водител на вести на ТВ Шамшад.

Но, портпаролот на Министерството за промоција на доблести и спречување на пороци, Мохамад Садек Акиф Мохаџир, ги предупреди дека ја прекршуваат владината наредба.

„Сите оние кои живеат во одреден систем мора да ги почитуваат законите и прописите на тој систем и да се придржуваат до наредбата“, рече тој.

Отказ соколку не се придржуваат до кодексот на облекување

Талибанците наредиле и жените вработени во владините тела да бидат отпуштени доколку не се придржуваат до новиот кодекс на облекување.

Талибанците повторно ја презедоа власта во Авганистан во август минатата година, најавувајќи пофлексибилен режим отколку за време на нивното прво, ригорозно владеење. Но, во последните месеци тие почнаа да ги намалуваат слободите на своите граѓани, особено на жените.

Најпрво од нив беше побарано да носат само хиџаб, марама што ја покрива главата, но го открива лицето. Потоа, на почетокот на мај наметнаа обврска да го носат целиот превез, по можност бурка. Ваквите правила беа на сила од 1996 до 2001 година, кога Талибанците првпат дојдоа на власт.