Во вторник (20 јануари) со почеток од 18.00 часот во Хернинг, Данска, најдобрата македонска ракометна репрезентација ќе го игра третиот натпревар во групата Б од прелиминарната фаза на Европското првенство.

Нашата селекција после ремито во неделата против Португалија, ги одржува надежите за пласман во главната фаза на континенталниот шампионат.

– Имавме многу осцилации во текот на натпреварот, го започнавме натпреварот во добра форма и игравме многу добро во одбраната. Потоа, темпото и нивото на натпреварот се кренаа и бевме во негатива, но успеавме да направиме пресврт на крајот и би рекол дека ја имавме победата во наши раце, но заврши нерешено. Сега, брзо ќе го заборавиме тој натпревар и целосно ќе се фокусираме на Романија – се зборовите на македонскиот репрезентативец Павле Атанасијевиќ на официјалниот сајт на ЕХФ.

Следен противник на избраниците на селекторот Кирил Лазаров е репрезентацијата на Романија која ги загуби сите шанси за влез во вториот круг.

– Ќе го дадеме најдоброто од себе, секој од нас, за да го добиеме натпреварот, и подобриот тим нека победи. Никола Маркоски доби црвен картон, потоа Иван Џонов се повреди, а мојот брат (Петар) е повреден од првиот натпревар, иако се обиде да игра против Португалија, но не можеше да игра и верувам дека селекторот се снајде навистина добро и дадовме сè од себе. Сега доаѓа и Гоце Ојлески и мислам дека ќе бидеме добро – вели Атанасијевиќ.

Доколку Македонија успее да се пласира во главната рунда, тоа ќе биде прв пат по Европското првенство во 2018 година да игра во следната фаза од натпреварувањето.

ГАЛЕРИЈА: Емоции, борба и на крај реми во Хернинг кое може многу да значи