Се подготвува надградба на зградата во скопската населба Кисела Вода во која пред години се случи пожар, пишува Марх.мк

Во една од долгите црни згради пред 15-на години се случи трагичниот пожар во кој загинаа четворица луѓе, а повеќемина беа примени во болница поради вдишан чад.

По големата трагедија, се отворија повеќе прашања во јавноста, меѓу кои беше употребата на пластифицираните елементи во архитектурата на објектот, како и узурпирањето на покривните проодни тераси.

Со ова, ќе се елиминира пристапот на сите станари до покривот на зградата, кој наменски е проектиран како рамен поради повеќе предности за: евакуација во случај на пожар, употреба на заеднички простории, социјализација и рекреација, пишува Марх.мк.

„Сето ова во изминатите 20 – 30 години, целосно исчезна поради отсуството на професијата во носењето на законите и урбанистичките планови (кои очигледно се кројат за богатење на поединци на штета на сите). Бидејќи се докажавме како народ со кратко паметење, по 15-на години од трагедијата која требаше да биде освестување и во корен да го сосече овој тренд, се соочуваме повторно со парадоксот на нашиот архитектонско-урбанистички свет“, пишува авторот на текстот, архитектот Филип Конески.

„На зградата веќе се наѕираат тарабите, рачната дигалка и пробивањето на кровното цокле, што е вовед во дејствијата кои нѐ прават сите соучесници. Ваквите интервенции се невозможни без да имате согласност од сите станари или доминантниот број. Сѐ на сѐ, уште еден пораз“, додава Конески.