По обвинувањата на пратеникот Димитар Апасиев кон ЈП Градски паркинг, односно пајак службата, дека работи „во спрега со урбаната мафија“, со став излезе и градот Скопје.

-Градот работи исклучиво во корист на граѓаните и за заштита на јавниот простор. Жителите на општина Аеродром имаат воведено зонско паркирање и можат да паркираат до три автомобили по симболична годишна такса. Пратеникот паркирал автомобил на улица блокирајќи го протокот на сообраќај и непрописно паркираниот автомобил бил отстранет од службите. „Градскиот паркинг“ постојано добива пријави од граѓани за блокирани тротоари и коловози и постапува по пријавите во согласност со законот, велат од Град Скопје.

Од таму нагласуваат дека законите важат подеднакво за сите, па и за несовесните пратеници кои ги прекршуваат забраните за паркирање на автомобили на коловоз.

Апасиев објави дека неговото возило било кренато од пајак службата, и ги повика инвеститорите да обезбедуваат паркинг места за станарите при продажбата на станови. Според него, ваквата обврска ја избегнувале затоа што ги подмитувале градоначалниците со станбен простор во објектите во градба.

-Во мое маало, во Аеродром, забележувам дека скоро секое утро по пет-шест пајак возила им ги креваат колите на станарите од пред зграда, на тој начин директно терајќи ги да купуваат паркинг места од инвеститорите и градежните компании. Во нормална држава, со купувањето на станот ти следува и твое ПАРКИНГ место (пред зграда или во подземна гаража). Но, нашите инвеститори – кои ги подмитуваат градоначалниците со по стан-два за секое издадено одобрение за градба – за да спечалат екстра профит, си соработуваат со локалните власти и сообраќајната полиција, дерејќи го народот со казни, за да го присилат да им ги купува прескапите паркинг места (кои чинат 5-6.000 ЕУР по место). Оти секое земање на возилото со пајак, ќе те кошта околу 100 ЕУР (2.500 ден. за пајакот + казна за погрешно паркирање). Ете така, мој народе, на дело се дешава она што неолибералните влади го викаат “јавно-приватно партнерство“, напиша Апасиев.

Никола Наумоски, шефот на кабинетот на градоначалникот Петре Шилегов на овој статус возрати со свој:

„Во нормална држава, пратеник кој што паркира на недозволено место и узурпира јавен простор, си дава оставка. Не плаче на фејсбук дека го казниле и кова планови со пријателот како на уставен да го „кутнат“ пајакот“, напиша Наумовски.