Ангеловски: Мојот договор со ФФМ завршува, за иднината не би сакал да говорам!
Македонскиот капитен Горан Пандев на денешната официјална прес-конференција пред утрешниот меч со Холандија на Европското првенство најави дека в понеделник (21 јуни, 18.00 часот) во Амстердам ќе го одигра последниот натпревар во националниот тим.
Капитенот на А селекцијата кажа дека е среќен што се збогува на еден ваков начин, на големо натпреварување. Им посакува на соиграчите уште многу успеси во иднина и е сигурен, познавајќи ги нивните квалитети дека уште многу пати во иднина сите ќе нè радуваат.
Селекторот на сениорите, Игор Ангеловски вели дека последниот меч треба да биде дополнителен мотив за сите.
– Знаеме против кого играме, Холандија е апсолутен фаворит, на наше е да ги повториме оние добри моменти од дуелот со Украина и да пробаме против таков изразит фаворит да се прикажеме во добро светло, да се бориме, да стигнеме до позитивен резултат.
Холандија е европски шампион во минатото, една од репрезентациите која често се бори за титулата европски шампион. Против такви репрезентации треба да се извади максимумот, да се покаже квалитетот – рече Ангеловски.
Потсетување дека овој меч со Холандија би можел да биде и последен за селекторот Ангеловски со кој има договор со ФФМ и репрезентацијата до крајот на ЕП.
– Да, договорот со ФФМ завршува и само можам да кажам едно големо благодарам, пред сè на Горан Пандев, најдобриот фудбалер во историјата на Македонија, среќен сум што работев со таков капитен и човек пред сè. До сите момци затоа што знаевме каде бевме пред пет и пол години, на кое место на ФИФА ранг листата, а каде ја донесовме Македонија, на Европско првенство, второ место во квалификациите (за СП), тоа доволно говори за сè она што направивме. Со Холандија ќе бидеме максимално посветени, а за иднината не би сакал да говорам, затоа што до последен ден максимално ќе го одработам професионално договорот што ми беше даден – додаде Ангеловски.