Америка одобри воен пакет од речиси една милијарда долари за Бугарија — какво сѐ оружје ќе набави Софија?
САД одобрија големо проширување на бугарската програма за борбените авиони Ф-16 Блок 70, вредно околу 957 милиони долари, објави „Новините“.
Препорачано
Со ова се дозволува продажба на дополнителни напредни ракети воздух-воздух, опрема за поддршка и други поврзани услуги.
Според новоодобрениот пакет, Бугарија ќе набави 125 ракети АИМ-120Ц-8 АМРААМ, најновото НАТО-оружје за воздушна борба надвор од визуелен домет, како и четири ракети АИМ-9 икс блок 2, наменети за воздушни пресметки од мала далечина. Договорот вклучува и пет дополнителни системи за наведување за АИМ-120Ц-8, резервни делови, техничка помош, одржување и логистичка поддршка.
Проширувањето додава околу 957 милиони долари на постојната програма за Ф-16, со што вкупната вредност на пакетот за авиони, оружје и поддршка за Бугарија се зголемува на приближно 2,63 милијарди долари. Од новоодобрениот износ, околу 452 милиони долари се наменети за главна одбранбена опрема. По ова ажурирање, вкупната вредност на основната одбранбена опрема во рамките на програмата достигнува околу 1,43 милијарди долари.
Според американската Агенција за одбранбена безбедносна соработка, дополнителните ракети значително ќе ги зајакнат оперативните способности на идната бугарска флота од авиони Ф-16 Блок 70. Американските власти велат дека оружениот пакет треба да ја подобри подготвеноста на земјата за извршување мисии за воздушна контрола, заштита на националниот воздушен простор, придонес во одвраќањето и учество во заеднички операции на НАТО.
Вашингтон нагласи дека новоодобреното оружје не било вклучено во првичното известување и дека претставува значително засилување на планираните борбени капацитети на бугарското Воено воздухопловство.
Според американската проценка, зајакнувањето на бугарските воени способности директно придонесува за засилување на источното крило на НАТО и за подобрување на колективната одбранбена позиција на Алијансата.
