Меѓународниот аеродром во Тирана, чии услуги ги користат голем број луѓе од Македонија, објави „итно известување“ за патниците кои треба да патуваат на 15 и 16 мај.

Раководството на аеродромот ги советува патниците кои ќе патуваат во споменатите два дена да се пријават на аеродромот најмалку три часа пред нивниот лет.

– На 15 и 16 мај Тирана ќе биде домаќин на Самитот на Европската политичка заедница, со учество на лидери од цела Европа. Поради безбедносни мерки и затворање на патишта се очекуваат застои и густ сообраќај. На патниците кои патуваат на овие датуми им се препорачува да планираат однапред и да се пријават на аеродромот најмалку три часа пред летот, пишува во известувањето.

На аеродромот во Тирана во првиот квартал од годинава регистрирани се 2.083.050 патници, или 9,1 отсто повеќе споредено со истиот период минатата година.

Освен албанските, услугите на аеродромот, во голем број, ги користат и македонските, косовските и црногорските граѓани.

Минатата година над 120 илјади македонски државјани пристигнале или отпатувале кон некоја од многубројните дестинации.