Ѕвездата на Портланд нема дилеми: Јокиќ е МВП
Бекот на Портланд треилблејзерс, Демиен Лилард смета дека Стеф Кари не заслужува да биде МВП на регуларниот дел од сезоната во НБА лигата, туку признанието треба да го добие центарот на Денвер, Никола Јокиќ.
Во пресрет на плеј-оф серијата помеѓу Портланд и Денвер која започнува во недела, Лилард му оддаде респект на Јокиќ.
– Никола Јокиќ играше највеќе од сите. Ги одигра сите натпревар и играше фантастично. Џамал Мареј се повреди, Вил Вартон се повреди, но тие продолжија да играат добро – вели Лилард.
Главни конкуренти на Јокиќ за МВП признанието му се центарот на Филаделфија, Џоел Ембид и бекот на Голден Стејт, Стеф Кари, но за Лилард нема дилеми.
– Стеф имаше фантастична сезона, очигледно е дека мора да се зборува за него како еден од кандидатите за признанието, но не мислам дека тој ќе победи. Неговиот тим е осми во Западната конференција. Така да не гледам како наградата не ја дадете на Јокиќ или на Ембид. Лично за мене Јокиќ е МВП бидејќи Ембид пропушташе натпревари – смета Лилард кој потоа се осврна и на плеј-оф пресметката со Денвер нагетс.
– Сметам дека шансите се подеднакви 50-50. Тие ќе кажат дека треба да победат, исто како што и ние ќе кажеме дека можеме да победиме. Тоа што се случуваше во регуларниот дел од сезоната, сега во плеј-офот не се смета. Затоа мислам дека имаме подеднакви шанси.