Вредноста на руската рубља во однос на американскиот долар се зголеми за 45 проценти од почетокот на оваа година, што ја прави една од валутите со најдобар курс во светот. Но, ненадејната апрецијација (зголемување на вредноста на парите) е меч со две острици за руската економија под санкции.
Силата на рубљата значи дека приходите од енергија, деноминирани во долари, генерираат помалку рубли во буџетот на Русија. Компаниите во оваа земја тврдат дека тоа е она што го прави извозот поскап за купувачите во долари и други валути. Сепак, гувернерката на Централната банка на Русија, Елвира Набиулина, смета дека слабата домашна валута би била знак на економска ранливост. Имено, според неа, девизниот курс не постои само за да им угоди на извозниците, а силната рубља е последица на строгата монетарна политика во борбата против високата инфлација.

Зголемувањето на вредноста на рубљата во однос на доларот првенствено беше предизвикано од рестриктивната монетарна политика на Централната банка на Русија и оптимизмот по разговорите меѓу Русија и Соединетите Американски Држави за прекинот на огнот во Украина- пишува Ројтерс.

Каматните стапки на депозитите во рубља се повеќе од 20 проценти, што ја направи валутата привлечна за штедачите и шпекулативните трговци поради нејзиниот принос. Покрај тоа, високите трошоци за задолжување го забавија увозот, намалувајќи ја побарувачката за странска валута. На рубљата ѝ помогна и слабеењето на американската валута, чиј индекс е за 6,6 проценти понизок отколку на 2 април, кога американскиот претседател Доналд Трамп објави промена во царинската политика.

Иако Централната банка на Русија уверува дека постои слободно флуктуирачки девизен курс, таа го продава кинескиот јуан како единствен главен инструмент за интервенција за поддршка на рубљата. Имено, кога рубљата зајакнува во однос на јуанот, таа зајакнува и во однос на доларот за да се избегне арбитража.

Посилната рубља ѝ помага на Централната банка да се бори против инфлацијата со тоа што го прави увозот поевтин. Првиот заменик генерален директор на руската државна банка ВТК, Дмитриј Пјанов, неодамна изјави дека ова е дел од намерна стратегија.

Руската валута е поддржана и од контролите на девизниот курс што беа воведени по почетокот на агресијата врз Украина за да се спречи одливот на капитал. Сепак, извозниците неодамна ги враќаат девизните приходи сè повеќе и повеќе, повеќе отколку што се бара.

Како да се тргува? Банките ги пријавуваат своите валутни квоти до Централната банка, која ги користи за да го утврди официјалниот девизен курс. Тоа е нетранспарентен пазар бидејќи само Централната банка има целосни податоци за трансакциите. Некои помали, претежно неруски банки ги даваат своите понуди на компании за собирање пазарни податоци. Рубљата повеќе не е една од главните меѓународно тргувани валути и многу западни компании и банки ја напуштија Русија. Сепак, Русија останува водечки извозник на нафта и земјоделски производи и 11-та најголема економија во светот.

Руските напори да ја префрлат трговијата кон незападни валути, особено јуанот, би можеле да имаат долгорочни последици за глобалната доминација на доларот. Големите економии како Кина и Индија внимателно ја следат ситуацијата. Доларот повеќе не е најтргуваната странска валута во Русија, туку јуанот. Повеќе од 95 проценти од руската трговија со Кина минатата година беше во јуан и рубља. Обемот на трговијата со јуан и рубља на Московската берза во 2024 година изнесуваше 420 милијарди долари, додека вкупната трговија на Русија со Кина изнесуваше рекордни 245 милијарди долари.

Вредноста на рубљата во однос на јуанот се зголеми за 25 проценти од почетокот на оваа година. Руските енергетски компании ги враќаат заработките во јуани, додека увозниците користат јуани за купување стоки. Русите сè уште го сметаат доларот за своја референтна валута, и покрај зголемената употреба на јуанот. Доларите и еврата се достапни во банките, но има многу помалку менувачници отколку порано. Со санкциите, Западот им го отежна патувањето во странство на Русите и вршењето меѓународни трансфери на долари и евра, намалувајќи ја побарувачката за готовина.

Русите купија странска валута во вредност од 200 милијарди рубљи во првиот квартал од оваа година, што е непроменето во споредба со истиот период лани.