Комедијата „Poor Things“, во режија на грчкиот режисер Јоргос Лентимос, ја освои престижната награда „Златен лав“ на годинашниот Венецијански филмски фестивал, кој се одржа од 30 август до 9 септември.

Филмот на британската продукција ги воодушеви присутните на фестивалот со својата „луда“ приказна за жена која по самоубиството ја реанимира луд доктор, кој го заменува нејзиниот мозок со мозокот на нејзиното неродено бебе.

Налик дете, но со тело на возрасна личност, ликот Бела Бакстер станува сè понезависна со нејзиното сексуално експериментирање, откривајќи се себеси низ надреалната верзија на Европа од 19. век.

Покрај Ема Стоун, која ја толкува главната улога, во филмот играат и актерите Вилем Дафо и Марк Рафало.

Наградите за најдобра глума им припаднаа на Кејли Спини, за улогата на Присила Присли во филмот „Priscilla“, и на Питер Сарсгард, за неговата улога во семејната драма „Memory“.

Наградата „Сребрен лав“ ја доби драмата „Evil Does Not Exist“ во режија на Јапонецот Рјусуке Хамагучи.