Зимница без конзерванси: Пеглани пиперки по традиционален рецепт
Пегланата пиперка мора да биде во вашата остава, а според овој проверен рецепт ја подготвувале нашите мајки и баби.
Пегланата пиперка е незаменлив дел од секоја зимница. Подготвена на овој начин, пиперката останува цврста и крцкава, малку пикантна, а е совршен додаток на секое јадење. Токму така некогаш ја правеа нашите мајки и баби, а самата процедура е прилично едноставна, важно е само да изберете меснати и свежи пиперки, кои на себе немаат никаква оштетување.
Состојки:
– 5 кг црвени меснати пиперки
– 500 мл масло
– 200 г сол
– 100 г шеќер
– 500 мл оцет
– 2 главици лук
– 1 лажичка зрна бибер
– една китка магдонос
Подготовка:
Пиперките добро измијте ги, исчистете ги од семките, па исечете ги на дебели ленти. Наредете ги во еден ред во длабок сад, потоа посипете ги со шеќер и сол, прелијте ги со масло и оцет, па одозгора наредете уште еден ред пиперки и повторете ја постапката додека не го потрошите целиот материјал.
Оставете ги да отстојат неколку часови, а можете и преку ноќ. Повремено мешајте ги, сите пиперки да бидат убаво покриени со мешавината од зачини.
Кога пиперките ќе омекнат, наредете ги во поголеми, претходно стерилизирани тегли, а меѓу нив ставете чешниња лук, зрна бибер и магдонос.
Секоја тегла наполнете ја со течноста што останала од пиперките, притиснете со пластична решетка, затворете ги капаците и ставете ги на темно и ладно место.