Зијадин Села ќе понуди оставка од лидерската функција!
Ќе се бара одговорност за лошите резултати на локалните избори веќе на претстојната седница на Централното собрание на партијата, која е закажана на 25 декември.
На претстојната седница на Централното собрание на Алијанса за Албанците (АА), која е закажана на 25 декември, треба да се расправа за резултатите од локалните избори. Како што дознава „Слободен печат“, притоа ќе се бара одговорност и од сите партиски структури.
Она што веќе е познато и јавно е објавено дека Арбен Таравари повеќе нема да биде генерален секретар на партијата, откако најави заминување од функцијата.
– Лично сметам дека за генерален секретар на партијата треба да се избере нов кадар, кој има повеќе време. Сигурно повеќе нема да бидам секретар на Алијанса за Албанците, ова е мојата конечна одлука што не може да се смени – рече Таравари.
„Слободен печат“ од партиски извори дознава дека на оваа седница оставка ќе понуди и лидерот на партијата Зијадин Села, но не се знае дали ќе биде прифатена од партиските структури.
– Господин Села е принципиелен. И во 2020 година, по парламентарните избори, на партиските структури им понуди оставка, но не беше прифатена. И овој пат мислам дека ќе го направи истото, но не се знае дали ќе биде прифатена – вели нашиот извор.
И Таравари смета дека Села треба да продолжи како лидер на АА, но додава дека Конгресот е отворен и секој може да се кандидира за претседател.
– Кој и да победи, ќе му честитаме и ќе го поддржиме, а ние ќе продолжиме со работа – рече Таравари.
Во меѓувреме, сите ограноци на партијата одржуваат собири на кои се анализираат резултатите од локалните избори, а сите извештаи се испраќаат до Централното собрание.
– Фракциите во ограноците ни донесоа лоши резултати во некои општини. Затоа ќе се разговара на Собранието. Сите опции се отворени, не бегаме од ништо – велат од АА.
Партискиот конгрес на АА се очекува да се одржи во март или април следната година.