Филмот „Жолти писма“ (Yellow Letters) на германско-турскиот режисер Илкер Чатак ја освои „Златната мечка“ за најдобар филм на 76. издание на Берлински меѓународен филмски фестивал – Берлинале.

Наградата му ја врачи претседателот на жирито, Вим Вендерс, кој го опиша остварувањето како силна и јасна филмска артикулација на политичкиот јазик на тоталитаризмот. Филмот ја следи приказната за брачен пар – драмска писателка и актерка во современа Турција – кои поради својот протестен театар стануваат мета на државата, а иако дејството се одвива во Турција, филмот е целосно снимен во Германија.

Сребрената мечка – големата награда на жирито ја доби „Спасение“ (Salvation) на Емир Алпер, додека наградата на жирито ѝ припадна на „Кралица на морето“ (Queen at Sea) на Ленс Хамер.

За најдобра главна улога беше наградена Сандра Хилер за историската драма „Ружа“ (Rose), а наградите за споредна улога ги освоија Ана Калдер-Маршал и Том Кортни за „Кралица на морето“. Сребрената мечка за режија му припадна на Грант Ги за „Сите го сакаат Бил Еванс“ (Everybody Digs Bill Evans), а за сценарио беше наградена Женевјев Дилуд де Сел за „Нина Роза“ (Nina Roza).

Во програмата „Перспективи“ главната награда ја освои „Хроники од опсадата“ (Chronicles From the Siege) на Абдалах Алхатиб, додека во програмата „Генерација“ – која ги опфаќа секциите „Генерација Кплус“ и „Генерација 14плус“, посветени на филмови за деца и млади – се истакнаа „Светот на Гугу“ (Gugu’s World) на Алан Дебертон и „Тажни девојки“ (Sad Girlz) на Фернанда Товар. Директорката на фестивалот, Триша Татл, порача дека силните изјави и дебати се дел од демократската култура, нагласувајќи дека емоционално набиеното издание е доказ дека и фестивалот и кинематографијата ја извршуваат својата општествена улога.