Канокпорн Тангсуан, која била алергична на млечни производи и јаткасти плодови, починала од анафилакса откако јадела во ресторанот на Дизни Ворлд во Орландо, се вели во тужбата поднесена минатиот четврток од нејзиниот сопруг, Џефри Џ. Пиколо.

Во тужбата против паркот Волт Дизни и ресторанот Раглан Роуд се вели дека Тангсуан, општ лекар во Њујорк, починала на 5 октомври откако јадела во ресторан во Дизни Спрингс, комплекс во Дизни Ворлд кој вклучува ресторани и продавници, пренесува Бизнис Инсајдер.

Тангсуан отишла во ресторанот со нејзиниот сопруг, верувајќи дека тој ќе преземе соодветни мерки на претпазливост за Тангсуан да не има алергиска реакција. Во тужбата се наведува дека Тангсуан и Пиколо постојано го предупредувале персоналот за нивните тешки алергии на јаткасти плодови и млечни производи и прашувале дали може да се подготват одредени јадења од менито без тие состојки.

Келнерот ги уверил Тангсуан и Пиколо дека нивниот оброк ќе биде безбеден за здравјето. Тангсуан нарачала помфрит, веганска пита и пржен кромид. По оброкот, парот отишол на шопинг, а Тангсуан набрзо развила тешка алергиска реакција; тешко дишела и паднала на подот. Иако таа ги зела своите алергиски лекови, таа веднаш била пренесена во болница, каде подоцна починала.

Пиколо бара отштета поголема од 50.000 долари, како и отштета за губење на сопругата, ментална болка и страдање, губење на приход и медицински и погребни трошоци. Според резултатите од обдукцијата, Тангсуан починала од анафилакса, тешка алергиска реакција на зголемено ниво на млечни производи и јаткасти плодови.