Деновиве е објавен албанскиот превод на книгата раскази „Делфинот“ кај познатото книгоиздавателство „Фан Ноли“ од Тирана. Преводот од македонски јазик е на Никола Судар, а книгата се препорачува како возбудливо дело на еден од „најдобрите балкански постмодернисти“.

Во најавата на книгата се истакнува стилското умеење, но и човечноста на авторскиот ракопис на Прокопиев, длабокото копање по интимноста, каде што ликот на Жената, Мајката, Маѓепсничката, Вештерката се дадени емотивно, но и духовито.

Збирката раскази „Делфинот“ е четврта книга на Прокопиев преведена на албански јазик, и трета, по „Човечулец“ и „Ѕиркач“ објавена кај реномираната издавачка куќа „Фан Ноли“ во Тирана.

Инаку, книгата раскази „Делфинот“ досега е преведена на словенечки, хрватски (распродадено издание) и бугарски јазик.

– Ме радува што книгите ми се преведуваат, иако се издадени пред десет или дваесет години – вели авторот – а и понатаму се читаат и оценуваат. Тоа е некој убав доказ за нивната долготрајност – додава Прокопиев.