Веста дека на лица помлади од 16 години би можел да им биде забранет пристап до социјални мрежи како ТикТок, Инстаграм и Снепчет предизвика бурни реакции кај младите во Велика Британија. Посебно внимание привлече одговорот на една ученичка од Ланкашир, која на прашањето што би правела без профилите на социјалните мрежи одговорила:

„Ќе зјапам во ѕид.“

Оваа изјава многумина ја протолкуваа како показател колку длабоко социјалните мрежи станале дел од секојдневието на младите. Бидејќи најавената забрана не се очекува да стапи на сила пред пролетта 2027 година, сè повеќе родители се прашуваат како да препознаат дали нивното дете развило зависност од телефон или станува збор за вообичаено тинејџерско однесување, пишува „Индекс“.

Ник Данкли, раководител на операции во британската организација за лекување зависности „УКАТ“, вели дека се забележува раст на бројот на лица под 18 години кои бараат помош поради прекумерно користење на социјалните мрежи.

Кога користењето станува зависност?

Според експертите, користењето на телефон и социјални мрежи преминува во зависност кога личноста чувствува постојана потреба да го повторува тоа однесување, дури и кога тоа ѝ штети.

Данкли објаснува дека причината е во самата природа на содржината.

„Овие кратки и динамични видеа се создадени да даваат моментално чувство на задоволство. Децата само скролуваат и често не забележуваат колку време поминува“, вели тој.

Тој додава дека наједноставен начин да се забележи проблемот е обид да му се одземе телефонот на тинејџер.

„Ако сакате да видите колку е сериозна ситуацијата, обидете се да му го земете телефонот на петнаесетгодишник“, вели тој.

Знаци на можен проблем

Според него, постојат одредени однесувања што можат да укажуваат на зависност, како што се избегнување контакт со очи, тешкотии во разговор лице в лице, нервоза и постојано посегнување по телефонот или поглед кон местото каде што се наоѓа.

Тој додава дека дел од овие однесувања може да бидат и нормален дел од тинејџерскиот период, но со текот на времето стануваат поизразени кај децата кои имаат проблем.

Дополнително, предупредува дека постојат и физички и психолошки знаци, како недостиг на сон поради долготрајно скролување, чести главоболки, замор, проблеми со концентрација и можно влошување на видот.

Во посериозни случаи, младите покажуваат однесување слично на други видови зависности – криење уреди, одбивање да ги предадат или обиди да избегнат надзор.

Што може да следи по забраната?

Доколку најавените ограничувања за користење социјални мрежи за лица под 16 години, а делумно и под 18 години, стапат на сила во 2027 година, експертите очекуваат дека дел од младите на почетокот ќе реагираат тешко на промените.

Родителите би можеле да забележат промени во расположението, зголемена раздразливост и почести конфликти. Според Данкли, клучна ќе биде поддршката од семејството и училиштата.

„Се надевам дека младите со време ќе се прилагодат. Дајте им шест месеци до една година и влијанието на социјалните мрежи нема да биде толку силно“, вели тој.

Тој додава дека целта не е нешто да се одземе, туку да се заштити детството.

„Не им одземаме нешто. Им враќаме дел од детството.“

Според него, еден од најголемите предизвици би можеле да бидат токму родителите кои ќе се обидуваат да ги заобиколат правилата за да им овозможат пристап до социјалните мрежи.

Сепак, тој смета дека ваквата забрана може да им помогне на родителите и училиштата полесно да постават граници без притисок од врсниците.

„Знаеме какво влијание можат да имаат социјалните мрежи врз децата. Лично, попрво би сакал моето дете да прави нешто друго отколку со часови да се споредува со недостижни идеали што ги гледа на интернет.“

Велика Британија ги забранува социјалните мрежи за деца под 16 години