На улицата “Димитрие Чуповски”, точно наспроти Гимназијата Јосип Броз Тито, беше одбележан почетокот со снимањето (т.н. Прва клапа) на новиот долгометражен игран филм “Мими” во режија на Даријан Пејовски, а во продукција на Скопје Филм Студио. Снимањето на филмот ќе трае до 16 ноември и е планирано да се реализира на повеќе локации во Скопје.

Режисерот на филмот, Даријан Пејовски истакна дека „Мими“ е психолошка драма за девојка која, потисната од родовите предрасуди во родниот крај, доаѓа да живее во Скопје.

-Мими се запознава со eкстровертната Сара и меѓу нив се раѓа пријателство што набрзо преминува во опсесија. „Мими“ е филм за површноста, и лажните фасади што ги покажуваме пред другите“ – изјави Даријан Пејовски.

Продуцентот Томи Салковски зборуваше за предизвикот да се снима филм во услови на светска пандемија.

-И покрај ситуацијата со Ковид-19 во која се наоѓаме, Агенцијата за филм продолжи континуирано да поддржува проекти од национален интерес, придонесувајќи кон одржувањето во живот на нашата филмска фела и сите филмски работници кои се дел од неа – изјави Томи Салковски.

Главната улога Мими, ја игра Наталија Теодосиева која нагласи дека оваа драма е показател за безнадежноста во која живеат младите.