Задоцнета порака со сочувство до Католичката црква од Нетанјаху
Израелскиот премиер Бенјамин Нетанјаху изрази сочувство до Католичката црква за смртта на папата Франциск во објава на социјалната мрежа „Икс“.
Препорачано
-Државата Израел изразува најдлабоко сочувство до Католичката црква и заедницата на католиците ширум светот за смртта на папата Франциск. Нека почива во мир – рече Нетанјаху во својата едноставна порака на англиски јазик, што ја објави во четвртокот навечер.
Израел на погребот на папата во сабота ќе го претставува неговиот амбасадор во Ватикан, Јарон Шајдман.
Ова е прва порака на израелскиот премиер по објавувањето на смртта на папата Франциск во понеделникот.
The State of Israel expresses its deepest condolences to the Catholic Church and the Catholic community worldwide at the passing of Pope Francis. May he rest in peace.
— Prime Minister of Israel (@IsraeliPM) April 24, 2025
Израелскиот претседател Исак Херцог беше еден од првите официјални лица во светот кој реагираше тој ден на смртта на папата, поздравувајќи го „човекот со длабока вера и безгранично сочувство“.
Оттогаш, ниту Нетанјаху, ниту некој од неговите клучни министри не зборуваа јавно за смртта на папата, за кој во Израел генерално се сметаше дека има пропалестински став.
До пред смртта, папата Франциск често упатуваше критики за војната во Газа, а во својата велигденска порака укажа на „драматичната хуманитарна ситуација“ во енклавата.
