Антологиската панк-рок химна „God Save The Queen“ од Секс Пистолс ќе биде повторно објавена во лимитирано издание по повод платинестиот јубилеј на кралицата, 45 години откако таа предизвика скандал во кралството.

Антимонархистичката химна, чии остри стихови ги потпишува фронтменот на бендот Џони Ротен, беше објавена во 1977 година, кога кралицата го прослави својот сребрен јубилеј – 25 години на тронот.

Песната, која зборува за кралицата како нечовечко суштество и го нарекува нејзиниот режим фашистички, тогаш беше забранета на радио и телевизија Би-Би-Си.

Но, тоа само ја направи уште попопуларна и заврши на второто место на официјалната листа за синглови, иако многу фанови на панкот до ден-денес мислат дека таа намерно била задржана таму за Род Стјуарт со „I Don’t Want To Talk About It“ да биде на првото место.

Неколку илјади плочи ќе бидат пуштени во продажба на 27 мај. Ова ги вклучува двете оригинални верзии, на „Virgin Records“ и „A&M Records“.

Секс Пистолс, имено, прво потпишаа договор со „A&M“, но поради нивното ужасно однесување, издавачот брзо ги избрка, по што младиот претприемач Ричард Бренсон ги привлече кон својот „Virgin“.

„Еден од најбараните винили во историјата се враќа на полиците. Двете изданија се во ограничено издание“, пишува на официјалниот Твитер профил на бендот.

One of the most sought after vinyl records in history returns to the shelves. Get your hands on a repress of both the A&M & Virgin God Save The Queen 7” vinyl, limited copies available of each.

Pre-order now https://t.co/810L80zRbk pic.twitter.com/UNbK2RlSoc

— Sex Pistols Official (@pistolsofficial) May 3, 2022

Членовите на бендот ја свиреа песната на денот на сребрениот јубилеј додека пловеа со брод на Темза и подоцна беа уапсени еден по еден додека излегуваа на брегот. Во меѓувреме, ставовите на Џони Ротен, со вистинско име Џон Лидон, омекнаа.

„Како човечко суштество, би ми недостасувала во светот“, рече Лидон во интервјуто пред пет години. „Не е таа виновна што е родена во златен кафез“, изјави денеска 66-годишниот панк ветеран.

„Нека живее долго. Не сакам да зборува за своето владеење, но нека живее долго“, нагласи тој.