Српскиот претседател Александар Вучиќ денеска оцени дека на Србите не им одговара замрзнувањето на конфликтот со Косово, бидејќи западните сили нема да го сменат нивниот став околу тој проблем, пренесува Бета.рс.

,,Има и такви кои тврдат дека, како што поминува времето, ние сме се посилни, а тие се послаби. Економски да, но политички е веќе друго прашање, бидејќи западните сили својот став околу Косово и Метохија не го менуваат. Што и да се случи, тие ќе се залагаат за независноста на Косово и отстранувањето од Србија по секоја цена“– изјави Вучиќ пред пратениците во Собранието на Србија.

Тој додаде дека замрзнувањето на конфликтот не им одговара на Србите кои и понатаму живеат во тие делови на Косово и нивниот начин на живот е неспоредливо потежок од тој на луѓето во централна Србија.

,,И тие сакаат да постојат преговори, да можеме во иднина да дојдеме до компромисно решение. Доколку не дојдеме, тој конфликт некој ќе го одмрзне. А ако се случи тоа, не е веќе прашање кој има повеќе оружје и кој е посилен, туку кој има право да враќа нечии деца во смртни сандаци“– рече претседателот Вучиќ.

Според него, задачата не е лесна и дека не е време за преголеми очекувања кои не се поклопуваат со реалноста.

Во својот говор тој кажа дека грешат оние кои мислат дека купувајќи време ќе го решат проблемот, и според начинот на кој ќе се справат со решението, ќе се види во каква состојба ќе се остави државата на идните генерации. Вучиќ вели дека во Косово и Метохија моментално живеат 95 илјади Срби и 1,35 милиони Албанци, а во минатото бројот на Срби, Црногорци и Југословенци во Косово бил над 30%, а сега односот е еден спрема 15 во корист на Албанците.