25 килограми чисто злато и 55 килограми сребро исчезнале од судско депо во Истанбул, а турските власти издадоа „црвена потерница“ преку Интерпол за да се фати крадецот, јави „Хуријет“.

Судските службеници на почеток од месецот утврдиле дека од депото на Судот во истанбулскиот кварт Бујукчекмеџе, каде се чувале докази, недостигаат злато и сребро, чија вредност се проценува над 147 милиони лири (три милиони евра). Тие забележале и дека долго време е отсутен нивни колега.

Турското обвинителство почна истрага, при што е утврдено дека главниот осомничен од Истанбул фатил авион за Лондон. Со него била и неговата сопруга, за која исто така е распишана потерница.

Во случајот засега е уапсен само еден осомничен.