По пет години „под клуч“, туристичкиот комплекс „Свети Стефан“ ќе биде отворен за гости најдоцна до јуни оваа година, откако се усвоени условите за спогодба на државата и „Адриатик Пропертис“.

Премиерот на Црна Гора, Милојко Спајиќ, соопшти дека се стекнати формалните услови за повторно отворање на градот-хотел  „Свети Стефан“, долгогодишен симбол на црногорскиот туризам.

Спајиќ истакна дека интензивните преговори овозможиле заштита на државниот и отстранување на ризикот од потенцијална штета поголема од 100 милиони евра, наведено во соопштението на Владата.

– Обезбедивме поповолни финансиски услови за домашните компании хотели „Свети Стефан“ и ХТП (хотелско-туристичка компанија) „Милочер“, чии приходи ќе се зголемат од 1.285.000 на 1.555.000 евра. Особено е значајно што државата ќе оствари удел во профитот од 10 отсто – рекол Спајиќ, пренесува Срна.

Тој рекол дека планот е да се продолжи закупот за период од пет години, период во кој комплексот не беше во функција, со јасна обврска на компанијата „Адриатик пропертис“ да го отвори хотелот најдоцна до јуни.

– Убедени сме дека повторното отворање на „Свети Стефан“ ќе придонесе за зајакнување на меѓународниот углед на Црна Гора како елитна туристичка дестинација и ќе го означи враќањето на светскиот џет-сет на една од најпрестижните локации на Медитеранот – порачал Спајиќ.

Градот – хотел „Свети Стефан“ го дочека својот 65-ти роденден затворен за туристи